იტალიურ ფეხბურთში დიდი სამწვრთნელო გადაადგილებებია. სინიშა მიჰაილოვიჩმა "კატანიას" თავკაცის პოსტი დატოვა. სიცილიური კლუბის ოფიციალურ ვებ-გვერდზე დაიბეჭდა სერბი სპეციალისტის წერილი, სადაც იგი აცხადებს, რომ მთავარი მწვრთნელის თანამდებობიდან მიდის და გულშემატკივარს ამ ნაბიჯისთვის ბოდიშს უხდის. იქვე მიჰაილოვიჩი ირწმუნება, რომ მისი ეს გადაწყვეტილება არ არის მოტივირებული სხვა გუნდში გადასვლის პერსპექტივით. 
ბალკანელი "კატანიაში" შუა სეზონში მივიდა, როცა გუნდი გასავარდნ ზონაში იმყოფებოდა, საბოლოოდ კი, სიცილიელებმა სერია A მე-13 ადგილზე დაასრულეს.
მართალია, მიჰაილოვიჩი ამტკიცებს, სხვა გუნდებთან არანაირი მოლაპარაკება არ მაქვსო, მაგრამ იტალიურ პრესას ამის ნაკლებად სჯერა და სერბ სპეციალისტს უკვე ორი ვარიანტი "გამოუძებნა". ერთ-ერთი ვერსიით, ახალგაზრდა ბალკანელი "ფიორენტინაში" ჩეზარე პრანდელის შეცვლის, რომელიც მსოფლიოს ჩემპიონატის დასრულების შემდეგ იტალიის ნაკრებში მარჩელო ლიპის ადგილს დაიკავებს. ინტერნეტ-გამოცემა TMW ირწმუნება, რომ ფლორენციელთა სპორტული დირექტორი პანტალეო კორვინო მიჰაილოვიჩს უკვე შეუთანხმდა.
მეორე ვარიანტი კიდევ უფრო რეალური ჩანს. აპენინელი მიმომხილველების მტკიცებით, "ინტერიდან" მადრიდის "რეალში" გადაბარგებული ჟოზე მოურინიოს მემკვიდრე სწორედ 41 წლის სერბი გახდება. სხვათა შორის, დაახლოებით ერთი თვის წინ, მიჰაილოვიჩი ხმამაღლა გაიძახოდა - ადრე თუ გვიან, აუცილებლად გავხდები "ნერაძურის" დამრიგებელიო.
"ინტერში" ბალკანელის გათავკაცების სჯერათ ტოტალიზატორებსაც. მილანელთა მომავალი მთავარი მწვრთნელის გამოცნობაზე მათ უკვე დაიწყეს ფსონების. ბუქმეიქერთა აშკარა ფავორიტი სწორედ მიჰაილოვიჩია, რომელზეც Sky Bet-ში ფსონები საკმაოდ დაბალ კოეფიციენტზე, 1.5-ზე მიიღება. ამ მაჩვენებლით სერბი მნიშვნელოვნად უსწრებს მეორე კანდიდატ რაფაელ ბენიტესს (კოეფიციენტი 4.5), შემდეგ კი თანაბარი კოეფიციენტებით ფაბიო კაპელო და როი ჰოჯსონი (ორივეს 10.0) მოდიან.
მოკლედ, ტოტალიზატორები "ინტერში" მიჰაილოვიჩის მისვლას პროგნოზირებენ და ისიც სათქმელია, რომ ასეთ შემთხვევებში ისინი თითქმის არასოდეს ცდებიან. აქვე ერთსაც დავამატებთ - 2006-08 წლებში სერბი უკვე წვრთნიდა "ნერაძურის", მაგრამ მაშინ გუნდის თავკაცის, რობერტო მანჩინის თანაშემწე იყო.
ბოლოს ისევ "კატანიას" დავუბრუნდებით. გუშინ გავრცელებული ინფორმაციით, სიცილიური კლუბი შესაძლოა ბრაზილიელ ზიკოს ჩააბარონ. ამგვარი ვარიანტის არსებობა მოგვიანებით "კატანია" სპორტულმა დირექტორმა პიეტრო ლო მონაკომაც დაადასტურა.
|
