დღეს რომის "სტადიო ოლიმპიკოზე" იტალიის თასის ფინალური მატჩი გაიმართება. სატიტულო შეხვედრაში ერთმანეთს ბოლო წლების უცვლელი ტრიუმფატორი "ინტერი" და მიმდინარე ჩემპიონატში მისი უმთავრესი კონკურენტი "რომა" დაუპირისპირდებიან. ფინალურ მატჩს გუნდები გარკვეული საკადრო პრობლემებით ხვდებიან. 
"როსონერის" შემადგენლობაში ტრავმირებული ვესლი სნეიდერი და ლუსიო ვერ ითამაშებენ. უკვე რამდენიმე კვირაა ჰოლანდიელ ნახევარმცველს ბარძაყის კუნთი აქვს დაშავებული, რის გამო პერიოდულად უწევს თავისი გუნდის თამაშების გაცდენა. "ლაციოსთან" შეხვედრის დროს სნეიდერს ტრავმა შედარებით გაურთულდა და ექიმებმა მას ფინალში თამაში კატეგორიულად აუკრძალეს.
ლუსიოსაც კუნთთან დაკავშირებული პრობლემები აქვს, თუმცა მისი მდგომარეობა კიდევ უფრო რთულია. "ინტერის" მედიკოსები არც იმას გამორიცხავენ, რომ ბრაზილიელს, შესაძლოა, ჩემპიონთა ლიგის გადამწყვეტი შეხვედრაც გაუცდეს.
"რომას" მხრიდან იტალიის თასის ფინალს დისკვალიფიცირებული განაპირა მცველი მარკო კასეტი დააკლდება. შეხვედრას გამოტოვებს ტრავმირებული ბრაზილიელი მეკარე დონიც, რომელიც კლაუდიო რანიერიმ გუნდის სამატჩო განაცხადში საერთოდ არ შეიყვანა.
ბოლოს გეტყვით, რომ ეს იტალიის თასის 62-ე გათამაშებაა. "იუვენტუსთან" ერთად, აღნიშნული ტურნირი ყველაზე ხშირად სწორედ "რომას" აქვს მოგებული. ამ გუნდებმა 9-9-ჯერ მოახერხეს ქვეყნის თასის მოგება. "ინტერის" საკლუბო მუზეუმში კი, იტალიის 5 თასი ინახება. შესაძლოა ლუსიოს ჩემპიონთა ლიგის ფინალიც გაუცდეს
ავტორი: გიგა თედორაძე
|
