მებრძოლი სული 
მილანის "ინტერი", გუნდი რომელმაც, 2010 წელს ახალი და მეტად პრესტიჟული "იმიჯი" შეითავსა - "გამარჯვება სიცოცხლის ფასად", ჟოზე მაურინიოს გუნდს, სწორედაც რომ ასეთი დევიზი შეეფერება. მილანელმა ფეხბურთელებმა, გულშემატკივართა სიმპათია მაშინ გაიღრმავეს, როდესაც მათ ევროპული ფეხბურთის ერთ-ერთი ყველაზე ძლევამოსილი კლუბი, ლონდონის "ჩელსი" გამოთიშეს ასპარეზობას... შემდეგ იყო, კატალონიის "ბარსელონა", რომელმაც საბოლოო "ფურორი" მოახდინა საფეხბურთო სამყაროში, დაიმსხვრა მითი, "ბლაუგრანას" უძლეველობის შესახებ, ეს კი მართლაც ნამდვილი სასწაული იყო. სეზონის დასაწყისში, მაურინიოს შეგირდებს, ჩემპიონთა ლიგის ფავორიტად არავინ მიიჩნევდა... ევროპელ ქომაგებს კვლავ "ბარსელონა" მიაჩნდათ ლიგის ფავორიტად, თუმცა ჟოზემ, ე.წ ფიზიკური კანონი დაარღვია და დაუმარცხებელი გუარდიოლა ესპანეთში, უტიტულოდ გაისტუმრა. უესლი სნეიდერი (მადრიდის ფაქტორი) 
მილანის "ინტერის" რიგებში, ერთი ძალიან საინტერესო წარსულის მქონე ფეხბურთელი ირიცხება. იგი, "ნერაძურას" გასული წლის აგვისტოში შეუერთდა და მაურინიოს გუნდის დასაყრდენ ძალადაც იქცა. ეს ფეხბურთელი, ყოფილი მადრიდისტა და აწ ინტერისტა უესლი სნეიდერია. ადამიანი, რომელიც თავისი სათამაშო სტილით ყველასგან გამოირჩევა, იგი მებრძოლი და რაც მთავარია ჭეშმარიტი ჰოლანდიური ფეხბურთის მიმდევარია, რომელმაც ლეგენდარული იოჰან კრუიფის მშობლიურ ნაკრებში სათანადო ადგილი დაიმკვიდრა და ევროპელ გულშემატკივართა უდიდესი ნაწილის სიმპათიები დაიმსახურა... სნეიდერი, მადრიდული ფინალის მასპინძელადაც შეგვიძლია მოვნათლოთ, რადგანაც უესლი მადრიდელი გულშემატკივრის საყვარელი ფეხბურთელია, რომელსაც 22 მაისს, "სანტიაგო ბერნაბეუს" ტრიბუნებიდან, ესპანელ ქომაგთა უდიდესი ნაწილი დაუჭერს მხარს. ჟოზე მაურინიო 
და ბოლოს... ჩემპიონთა ლიგის ყველაზე დიდი გასაღები პორტუგალიიდან... ადამიანი, რომელიც გენიოსად მონათლეს, მწვრთნელი რომელიც ან უყვართ ან სძულთ, პიროვნება, რომლისთვისაც შეუძლებელი არაფერია... თქვენს წინაშეა, ჟოზე მაურინიო... ალბათ, მილანური გრანდის წარმატების მთავარი შემოქმედი სწორედ რომ ჟოზე მაურინიოა. ადამიანი, რომელმაც მილანის "ინტერის" დიად ისტორიაში, ახალი ერა შექმნა, მან ხომ "ნერაძურას" 40 წლიანი, უსიამოვნო ტრადიცია დაარღვია და გუნდი ჩემპიონთა ლიგის ფინალში გაიყვანა. მაშ ასე, ხვალ, "სანტიაგო ბერნაბეუს" დიდებულ არენაზე, კიდევ ერთ გამოცდას გაივლის, ჟოზეს დაუმარცხებელი მექანიზმი, რომელმაც ლონდონურ-კატალონიური დაუძლეველი ბარიერები გადალახა... ავტორი: გიგა თედორაძე
|
