ზედიზედ მეექვსე საჩემპიონო ტიტულისთვის მებრძოლმა "ინტერმა", "ბრეშასთან" გასვლით შეხვედრაში დაუგეგმავი ქულები დაკარგა. პირველ წრეში ამ გუნდებს შორის "სან სიროზე" გამართული შეხვედრის მსგავსად, გუშინდელი დაპირისპირებაც ფრედ, 1:1 დასრულდა. 
"მარიო რიგამონტიზე" სტუმრები მე-18 წუთზე დაწინაურდნენ. ვესლი სნეიდერის მიერ მოწოდებული კუთხურის შემდეგ, მაღალი ბურთისთვის ბრძოლა რანოკიამ მოიგო, რის შედეგადაც სამუელ ეტოომ მიმდინარე ჩემპიონატში თავის მე-19 გოლი გაიტანა. "ინტერის" ფეხბურთელები ამის შემდეგ ზედმეტად თავდაჯერებულები და ინერტულები გახდნენ. ლეონარდოს შეგირდებს აშკარად ეტყობოდათ, რომ თავში "ბაიერნთან" საჩემპიონთალიგო დაპირისპირება უტრიალებდათ და სერია A-ს აუტსაიდერთან შეხვედრაში ძალების დაზოგვას ცდილობდნენ.
მეტოქის ჯეროვნად შეუფასებლობამ და ლეონარდოს შეცდომამ (მილანელთა მთავარმა მწვრთნელმა 2 მცველი შეცვალა, რაც ფეხბურთში საკმაოდ იშვიათად ხდება) "ინტერს" 2 ქულა დააკარგვინა. მატჩის ბოლო მონაკვეთის მთავარი მოქმედი პირები (და არა გმირები) კორდობა და კარაჩიოლო გახდნენ. 84-ე წუთზე, სტუმართა კართან მოწოდებული კუთხურისას, "ნერაძურის" კოლუმბიელმა მცველმა თავით უხეიროდ ითამაშა, შედეგად, ბურთი მეკარის მოედანში მდგომ კარაჩიოლოს მიუვიდა და "ბრეშას" საუკეთესო ბომბარდირმაც თავური დარტყმით ანგარიში გაათანაბრა.
90-ე წუთზე, კარაჩიოლოს დუბლის შესრულების რეალური შანსი მიეცა. "ინტერის" მცველებს ედერის გარღვევა გამოეპარათ და კორდობამ ბრაზილიელი მეტოქე საჯარიმოში წააქცია. შეხვედრის არბიტრმა კოლუმბიელის უხეშობა ბოლო იმედის ჯარიმად შეაფასა და სტუმართა კარში დანიშნულ თერთმეტრიანთან ერთად, სამხრეთამერიკელი უკანახაზელი მოედნიდან გააძევა. "ბრეშას" გულშემატკივართათვის სამწუხაროდ, კარაჩიოლოს მიერ პენალტის ნიშნულიდან დარტყმული ბურთი ჟულიო სეზარმა მოიგერია და საკუთარი გუნდი მარცხისგან იხსნა. აქვე დავამატებთ, რომ კომპენსირებულ დროში, კარაჩიოლომ თავი წითელი ბარათის მიღებითაც "გამოიჩინა".
აღსანიშნავია, რომ ეს "ბრეშასთვის" ზედიზედ მეოთხე ფრე იყო, თუმცა ამას გუნდის სატურნირო მდგომარეობაზე არანაირად არ უმოქმედია. "ინტერმა" კი ბოლო თვრამეტ საჩემპიონატო შეხვედრაში ფრედ პირველად ითამაშა და ტურის დასრულების შემდეგ, ლიდერ "მილანს" სავარაუდოდ 7 ქულით ჩამორჩება.
11 მარტი
ბრეშა, "მარიო რიგამონტი”, 24000
ბრეშა-ინტერი 1:1 (0:1)
ბრეშა: არკარი, ბეგა, ძობოლი, ზებინა, ძამბელი (ედერი 61), ბერარდი (დაპრელა 25), ჰეტემაი, ვოში (ლანცაფამე 83), დიამანტი, კონე, კარაჩიოლო.
მწვრთნელი: ჯუზეპე იაკინი.
ინტერი: ჟულიო სეზარი, რანოკია, ლუსიო (კორდობა 65), ნაგატომო (მატერაცი 78), მაიკონი, ხავიერ ძანეტი, სტანკოვიჩი, სნეიდერი, პანდევი, ეტოო, პაცინი (ხარჯა 70).
მწვრთნელი: ლეონარდო.
გოლები: 0:1 ეტოო (18), 1:1 კარაჩიოლო (84).
90-ე წუთზე კარაჩიოლომ პენალტი ვერ გამოიყენა.
გაფრთხილება: დაპრელა (27), ზებინა (39), კარაჩიოლო (43), კონე (55), ჰეტემაი (88) - მაიკონი (52).
გაძევება: კარაჩიოლო (90+5) - კორდობა (89).
მსაჯი: ჯანლუკა როკი.
დარტყმა 18 (7)-16 (7); ჯარიმა 21-11; კუთხური 6-6; თამაშგარე 3-1; ბურთის ფლობა 42%-58%; სეივი 6-6.
|
