ჯერ კიდევ გასულ სეზონში, ბრაზილიელი ლეონარდო "მილანს” ედგა სათავეში, 2010 წლის მიწურულს კი "როსონერის” ყოფილი მოთამაშე და დამრიგებელი "შავწითელთა” დაუძინებელი მტრის, "ინტერის” მთავარ მწვრთნელად დაინიშნა. ეს ფაქტი 2 მილანური გრანდის დაპირისპირებას ახალ ელფერს სძენს, ჩვენ კი "ნერაძურის” წინამძღოლის რანგში ლეონარდოს პირველ ინტერვიუს გთავაზობთ. 
- რას ნიშნავს თქვენთვის ისეთი კლუბის მთავარმწვრთნელობა, როგორიც მილანის "ინტერია”?
- "ნერაძურის” სათავეში მოსვლა ჩემთვის მიმზიდველი და ამავდროულად, მოულოდნელი გამოცდაა. პლანეტის ერთ-ერთ საუკეთესო გუნდს იმ მომენტში გავწვრთნი, როდესაც მას თავისი ხანგრძლივი ისტორიის ყველაზე საინტერესო პერიოდი უდგას. გასულ წელს ხომ "ინტერმა” ჩემპიონთა ლიგა, მსოფლიოს საკლუბო პირველობა, იტალიის ჩემპიონობა და თასი მოიგო.
- "ინტერისგან” თუ ელოდით ამგვარ წინადადებას?
- კონკრეტულად მილანური გრანდისგან არა, მაგრამ სერიოზულ კლუბში მუშაობაზე ვოცნებობდი და ეს ნატვრა ამიხდა.
- ბევრისთვის უცნაური გადაწყვეტილება მიიღეთ. თქვენ ხომ "ინტერელად” არასდროს ითვლებოდით...
- ყოველთვის ვაფასებდი თავისუფლებას და ამ მხრივ "ინტერში” შეზღუდვა არ მექნება. მართალია, "მილანთან” ბევრი რამ მაკავშირებს, მაგრამ "ინტერში” მოსვლით თავს დამნაშავედ ნამდვილად არ ვგრძნობ. მასიმო მორატის წინადადებაზე უარის თქმა არ შემეძლო – საკუთარი სამწვრთნელო შესაძლებლობების გამოცდა მსურს.
- არ ღიზიანდებით, მოღალატეს რომ გიწოდებენ?
- ნებისმიერ თვალსაზრისს, თუნდაც, ჩემთვის მიუღებელს, პატივს ვცემ, მაგრამ ეს ის შემთხვევაა, როცა თავს უხერხულად არ ვგრძნობ. თავისუფალი ადამიანი ვარ და არჩევანის თავისუფლებაც გამაჩნია.
- როგორ შეადარებთ "მილანსა” და "ინტერში” ჩატარებულ პირველ წვრთნას?
- ეს შედარება უადგილოდ მიმაჩნია. გუნდის ნებისმიერი ვარჯიში მეორეს არ ჰგავს.
- როგორ გგონიათ, "ინტერს” იტალიის ჩემპიონობის შენარჩუნების შანსი კვლავ აქვს?
- ამაში ეჭვიც არ მეპარება. მართალია, კონკურენტებს გვარიანად ჩამოვრჩით, თუმცა, სიტუაციას უიმედოს ვერ ვუწოდებდი.
- ამიერიდან, თქვენი უმთავრესი კონკურენტი "მილანია”. ამის გამო თავს უხერხულად არ იგრძნობთ?
- მხოლოდ იმაზე ვიფიქრებ, როგორ დავეწიოთ "როსონერის”. "მილანი” სადღეისოდ ჩემპიონობის უპირველესი ფავორიტია, მაგრამ მსოფლიოს საკლუბო პირველობის მოგებამ ჩვენს გუნდს დამატებითი სტიმული მისცა. სკუდეტოსთვის ბოლომდე ვიბრძოლებთ.
- "ინტერი” სატრანსფერო ბაზარზე გააქტიურებას თუ გეგმავს?
- მასიმო მორატიმ დამიდასტურა 5 ფეხბურთელის ყიდვას რომ აპირებს.
- ამბობენ, რომ "ინტერში” კაკას გადაყვანას ფიქრობთ...
- რიკარდუს მშვენივრად ვიცნობ და შემიძლია დანამდვილებით მოგახსენოთ, რომ იგი "რეალს” არ დატოვებს, სანამ "სამეფო კლუბთან” ერთად მნიშვნელოვან წარმატებას არ მიაღწევს. რაც შეეხება სხვა ტრანსფერებს, ამ საკითხზე ამჟამად კლუბის სპორტული დირექტორი მუშაობს. ჯერჯერობით, გადაწყვეტილი არაფერია. ამიტომაც "ნერაძურის” მომავალ ფეხბურთელთა გვარებს ვერ დაგიკონკრეტებთ.
ავტორი: გიგა თედორაძე
|
