იტალიის ნაკრები, ნებისმიერ მუნდიალზე გულშემატკივართა განსაკუთრებულ ინტერესს იწვევს. შესაძლოა, "სკუადრა აძურას” ფავორიტად ბევრი არ მიიჩნევს, მაგრამ სკეპტიკოსები იმასაც აღიარებენ, მარჩელო ლიპის გუნდთან ხუმრობა არ შეიძლება და აპენინელებს საფეხბურთო სამყაროს გაკვირვება ამჯერადაც ხელეწიფებათო. თავად იტალიელთა ნაკრების დამრიგებელმა, პრეტორიის მახლობლად მდებარე საწვრთნელ ბაზაზე ნაკრები ავარჯიშა, საღამოს კი, ჟურნალისტებისთვის პრესკონფერენცია ჩაატარა. 
- სამხრეთ აფრიკას მსოფლიოს ჩემპიონის რანგით ესტუმრეთ, "სკუადრა აძურა”, ტრადიციულად, მაღალი კლასის გამოცდილი ფეხბურთელებითაა დაკომპლექტებული, მაგრამ თქვენს გუნდს, მომავალი მუნდიალის ფავორიტად, მაინც ცოტა ვინმე თუ მიიჩნევს. რატომ?
- ვერ ვიხსენებ მსოფლიოს ვერცერთ ჩემპიონატს, რომლის დაწყებამდეც, იტალიას პლანეტის საუკეთესო ნაკრების ტიტულის მოპოვებას უწინასწარმეტყველებდნენ. ამიტომაც, სულაც არ მიკვირს, წელსაც ასე რომაა. ქაღალდზე ესპანეთი და ბრაზილია განსაკუთრებით ძლიერად გამოიყურებიან, მაგრამ მუნდიალის დონის ტურნირებში საბოლოოდ გამარჯვებული, ყოველთვის საუკეთესო მოთამაშეებით დაკომპლექტებული ნაკრები ვერ ხდება. კითხვის დასმისას სიტყვა "გამოცდილი” იხმარეთ, რაც თავისთავად ასაკოვან ფეხბურთელებს გულისხმობს. ხშირად ამბობენ, იტალიას "გადაბერებული” შემადგენლობა ჰყავსო, მაგრამ გადახედეთ სტატისტიკას და დარწმუნდებით, რომ "სკუადრა აძურა”, ტურნირის ყველაზე ასაკოვანი გუნდი რომ არაა. იმასაც მსაყვედურობენ, სამხრეთ აფრიკაში გერმანიის მუნდიალის ტრიუმფატორების დიდი ნაწილი რომ არ ვიახლე. არც ესაა გასაკვირი – დამისახელეთ მსოფლიოს ჩემპიონი, რომელმაც მომდევნო სამუნდიალო განაცხადში ოცდასამივე ჩემპიონი შეიყვანა. შესაძლოა, "სკუადრა აძურას” მოთამაშეები ახალგაზრდები არ არიან, მაგრამ ეს სრულებითაც არ ნიშნავს იმას, რომ მომავალი მუნდიალის მატჩების მსვლელობისას, ისინი ასპარეზობისთვის განკუთვნილი მთელი დროის განმავლობაში, სრული დატვირთვით თამაშს ვერ შეძლებენ.
- "სკუადრა აძურას” თქვენს მიერ დასახელებული სამუნდიალე განაცხადის გაცნობის შემდეგ, ჟურნალისტებმა, საფეხბურთო ექსპერტებმა, გულშემატკივრებმა და პოლიტიკოსებმა უკმაყოფილება ღიად გამოხატეს სიაში ანტონიო კასანოს, მარიო ბალოტელის, ფაბრიციო მიკოლის და ფრანჩესკო ტოტის არშეყვანის გამო. რა პასუხს გასცემდით ამ ადამიანებს?
- ყველაზე საინტერესო, იცით რაა? მსოფლიოს ჩემპიონატის სტარტის წინ, უამრავი ადამიანი "ექსპერტი” რომ ხდება, დასრულდება მუნდიალი და მათ, ფეხბურთისადმი ინტერესი უნელდებათ. ამასთან, ჩვენი კრიტიკა ჟურნალისტებსაც არ ავიწყდებათ, მაგრამ თუკი, მუნდიალზე კარგად გამოვედით, დითირამბებს გვიმღერიან და ურცხვად აცხადებენ, ვიცოდით, "სკუადრა აძურა” წარმატებას რომ მიაღწევდაო. მოდით, გულახდილად ვთქვათ, მსოფლიო დონის არც ერთი ფეხბურთელი განაცხადს მიღმა არ დამიტოვებია.
- წელს, განსაკუთრებული მუნდიალი იმ ასპექტითაც გველის, ნაკრებებს ბევრი ვარსკვლავი და წამყვანი მოთამაშე რომ დააკლდება. ამ მხრივ, "სკუადრა აძურაში” რა მდგომარეობაა?
- მაურო კამორანეზიმ მუხლის ტრავმა მოირჩინა და ვარჯიში განაახლა. უფრო სერიოზულადაა ანდრეა პირლოს საქმე. მას ფეხის კუნთი აქვს დაჭიმული და დანამდვილებით შემიძლია მოგახსენოთ, რომ პარაგვაისთან სასტარტო მატჩს, გამოტოვებს. სავარაუდოდ, მას ახალ ზელანდიასთანაც არ ვათამაშებ, აი, 24 ივნისს, სლოვაკეთთან ჯგუფური ეტაპის დასკვნით შეხვედრას კი, ანდრეა აუცილებლად ჩაატარებს. როგორც ხედავთ, ტრავმიანობის მხრივ, საგანგაშო მდგომარეობა არ გვაქვს.
- პირველი მატჩის სასტარტო შემადგენლობა, უკვე განსაზღვრული გაქვთ?
- საბოლოო გადაწყვეტილებას ბოლო მომენტში მივიღებ, ამიტომაც, კონკრეტულ პასუხს ვერ გაგცემთ.
- როგორი განწყობით ხვდებით მომავალ მუნდიალს?
- სადღეისოდ, საბრძოლველად უფრო დამუხტული ვარ, ვიდრე 4 წლის წინ გახლდით. ტაქტიკასთან დაკავშირებით, მოწინააღმდეგეებს სიურპრიზი მოვუმზადე, ოღონდ ერთია, სხვადასხვა მიზეზთა გამო, ტესტ-მატჩებში ამ იდეების სათანადო აპრობაცია ვერ მოვასწარი. იქნებ, ასეც ჯობდეს - მეტოქეებს წარმოდგენაც არ აქვთ, რა სიურპრიზს ვუმზადებთ.
ავტორი: გიგა თედორაძე
|
