გუშინ, ინგლისური პრესაში გავრცელებული ინფორმაცია დღეს მერსისაიდულმა კლუბმა ოფიციალურად დაადასტურა – რაფაელ ბენიტესი "ლივერპულის” მწვრთნელი აღარაა. 
გთავაზობთ "ლივერპულის” ოფიციალურ ვებ-გვერდზე გამოქვეყნებულ განცხადებას: "კლუბის ხელმძღვანელობა მადლობას უხდის ბენიტესს "ლივერპულში” გატარებული 6 წლის გამო და მას სამომავლოდ წარმატებებს უსურვებს. კლუბმა უკვე დაიწყო ბენიტესის შემცვლელის ძებნა და ამ საკითხთან დაკავშირებით განცხადებას მანამ არ გავაკეთებთ, სანამ ახალ მწვრთნელს არ დავნიშნავთ”.
ბენიტესის განთავისუფლების შემდეგ კომენტარი გააკეთა "ლივერპულის” პრეზიდენტმა, მარტინ ბროუტონმა: "ბენიტესი სამუდამოდ იქნება "ლივერპულის” ნაწილი, რადგან მან ისტორიული ჩემპიონთა ლიგის ფინალი გვაჩუქა. თუმცა, წარუმატებელი ბოლო სეზონის გათვალისწინებით, გადავწყვიტეთ მასთან თანამშრომლობა გაგვეწყვიტა”.
კომენტარი გააკეთა თავად ბენიტესმაც: "დამწუხრებული დავრჩი როცა გავიგე, რომ "ლივერპულის” მწვრთნელი აღარ ვიყავი. მადლობას ვუხდი სამწვრთნელო შტაბს და ფეხბურთელებს გაწეული დახმარებისთვის. აქ გატარებული კარგი დრო ჩემს გულში სამუდამოდ დარჩება. სიტყვები არ მყოფნის გულშემატკივრების მისამართით მადლობის გამოსახატად. ამაყი ვარ იმით, რომ "ლივერპულის” მწვრთნელი ვიყავი. მადლობას გიხდით ყველას და დაიმახსოვრეთ: შენ არასოდეს იქნები მარტო”.
შეგახსენებთ, რომ ბენიტესი "ლივერპულის” მწვრთნელი 2004 წლიდან იყო. 6 სეზონის მანძილზე მან გუნდს თითოჯერ ჩემპიონთა ლიგა, ასოციაციის თასი, ევროპის სუპერთასი და კომუნითი შილდი მოაგებინა.
გასული სეზონის მიწურულს, კარგა ხნის მანძილზე ვრცელდებოდა ხმები, რომლის თანახმადაც ბენიტესს "იუვენტუსი” უნდა ჩაებარებინა. მართალია ტურინელებს მწვრთნელი უკვე ჰყავთ, მაგრამ ბენიტესს მაინც იტალიაში დასაქმებას უწინასწარმეტყველებენ. ესპანელი სპეციალისტის სახელს, ამჯერად, უთავო "ინტერს” უკავშირებენ.
ავტორი: გიგა თედორაძე
|
