იტალიის ეროვნული ნაკრების თავკაცი მარჩელო ლიპი სამხრეთ აფრიკაში 24 ფეხბურთელს წაიყვანს. საქმე ისაა, რომ "იუვენტუსის" ნახევარმცველ მაურო კამორანეზის მცირე ტრავმა აწუხებს და შესაძლოა, მან მუნდიალამდე გამოჯანმრთელება ვერ მოასწროს. ამ შემთხვევაში, "სკუადრა აძურას" სამუნდიალო განაცხადში კამორანეზის ადგილს "კალიარის" შუახაზელი ანდრეა კოსუ დაიკავებს. 
"გადავწყვიტე, სამხრეთ აფრიკაში განაცხადს მიღმა დარჩენილი ერთი ფეხბურთელი წავიყვანო. ეს კოსუ იქნება. ჩვენ ყურადღებით ვაკვირდებით კამორანეზის ჯანმრთელობის მდგომარეობას და თუკი მაურომ მწყობრში ჩადგომა ვერ მოასწრო, მას კოსუ შეცვლის. საბოლოო შემადგენლობის დასახელება ძალიან ძნელი იყო. განსაკუთრებით როსისთვის გამიჭირდა უარის თქმა. მაგრამ ჩემს პრიორიტეტს ტაქტიკური სქემები წარმოადგენს. შემადგენლობაც ამის მიხედვით ავარჩიე", - ამბობს ლიპი.
Football Italia-ს მტკიცებით, "სკუადრა აძურას" თავკაცი მომზადების პერიოდში განსაკუთრებულ აქცენტს 3 თავდამსხმელით თამაშზე აკეთებდა და მსოფლიოს ჩემპიონატზეც ამ ტაქტიკური მონახაზით თამაშს აპირებს. იმავე გამოცემის ინფორმაციით, ლიპი, ძირითადად, იაკვინტა-ჯილარდინო-დი ნატალეს ტრიოს დაეყრდნობა. დღეს, მექსიკასთან შეხვედრაში, იტალიის ძირითადში სწორედ ეს შემტევები იქნებიან.
"მექსიკასთან დაპირისპირებას უდიდეს მნიშვნელობას ვანიჭებ. ეს მატჩი განვლილი მოსამზადებელი პერიოდის ერთგვარი შეჯამება გახდება. ამ შეხვედრაში უკვე პრაქტიკულად გამოვცდით იმ სქემას, რომელსაც მთელი შეკრების განმავლობაში ვამუშავებდით", - აღნიშნავს ლიპი.
აქვე დავამატებთ, რომ მსოფლიოს ჩემპიონატის დაწყებამდე, იტალიელები, მექსიკის გარდა, შვეიცარიასთანაც (ხუთ ივნისს) ითამაშებენ, ხოლო მუნდიალზე "სკუადრა აძურა" თავის პირველ შეხვედრას 14 ივნისს, პარაგვაის წინააღმდეგ გამართავს.
ავტორი: გიგა თედორაძე
|
