იტალიის ჩემპიონმა, ინტერმა, ვერონაში კიევოსთანაც შეძლო და დამარცხდა.ნერააძურის კოშმარი გრძელდება – დერბიში მარცხსა და ლეჩესთან, ბრეშიასთან ფრეს, მილანელებმა კიევოსთან მარცხიც მოაყოლეს. მართალია უამრავი ტრავმირებული ჰყავს გუნდს, თუმცა მასიმო მორატის კიდევ ერთხელ მოუწევს კარგად დაფიქრება, სანამ პრესასთან განაცხადებს, რომ ბოლომდე ენდობა ესპანელს.
კიევოსთან მატჩამდე ინტერმა კიდევ სამი ფეხბურთელი დაკარგა: კრისტიან კივუ, ფელიპე კოუტინიო და დიეგო მილიტო. რუმინელი მცველი ხავიერ ძანეტიმ ჩაანაცვლა, ხოლო მარჯვნივ სანტონი გამოვიდა. ბენიტესმა არ გარისკა და მატერაცი არ ათამაშა. მის ნაცვლად მოედანზე ივან კორდობა გამოვიდა. ძირითადს დაუბრუნდა ესტებან კამბიასო, ხოლო სათადარიგო სკამზე ისეთი ფეხბურთელები მოხვდნენ როგორებიც არიან ნატალინო, ნვოკვო და ალიბეკი. რაც შეეხება კიევოს, შემადგენლობასთან პრობლემა ვერონელებს არ ჰქონიათ. გუნდს დისკვალიფიკაცირებული კევინ კონსტანი და ბოშტიან ცესარი დაუბრუნდნენ. რაც მთავარია გუნდს როგორც იქნა დაუბრუნდა სერჟიო პელისე.
პირველი მომენტი სტუმართა კართან მატჩის მეხუთე წუთზე შეიქმნა, როცა კიევოელმა სირილ ტერომ ფლანგიდან შეუტია და შორეულ ცხრიანში სცადა ბურთის გადაგზავნა. ამ ეპიზოდში ლუკა კასტელაცი მოწოდების სიმაღლეზე აღმოჩნდა და ბურთი კუთხურზე მოიგერია. საპასუხოდ ეტოო – პანდევის დუეტმა შეუტია და მაკედონიელის დარტყმა ძელმა მოიგერია.
ბურთის ფლობას დიდი ნუგეში ინტერისთვის არ მოუტანია. შორიდან ურტყავდა დეიან სტანკოვიჩი, თუმცა ბურთი მიზანს მუდმივად სცდებოდა. ვერც ფლანგებზე ჰქონდათ "შავ-ლურჯებს” გამართული სიტუაცია. დევიდე სანტონი მაიკონის თამაშთან ახლოსაც ვერ მივიდა, შეიძლება ცუდ ფორმაში მყოფ მაიკონსაც კი ეჯობა იტალიელი ახალგაზრდასთვის. სწორედ დევიდემ წააგო პელისესთან ბრძოლა და ამ უკანასკნელმაც ინტერის კარში გოლის გატანა შეძლო. ეს ყველაფერი კი 29-ე წუთზე მოხდა.
რამდენიმე წუთში კიევოს ანგარიშის ორამდე გაზრდაც შეეძლო, თუმცა ლუსიომ კარგად ითამაშა და სიტუაციაც განიმუხტა. ამის შემდეგ იყო მომენტი, რომელიც მსაჯთა ბრიგადას შეუმჩნეველი დარჩა. სავარაუდოა, რომ ეს ფაქტი არ დარჩება იტალიის ფეხბურთის ფედერაციის ყურადღების გარეშე. კერძოდ კი, სამუელ ეტოოს ნერვებმა უმტყუნა და თავი ცესარს მკერდში ჩაარტყა. მიუხედავად იმისა, რომ კამერუნელს მომენტამდე რამდენჯერმე იჭერდნენ, ეს მას არ ამართლებს და იგი გაგდებას იმსახურებდა.
მეორე ტაიმში ინტერი შეტევაში წავიდა და კიევოს კონტრ-შეტევებზე თამაშის საშუალება მიეცათ. სწორედ ამის გამო მასპინძლებს რამდენჯერმე შეეძლოთ ჩემპიონების დასჯა. მარტო ფერნანდესის მომენტი რად ღირს! კასტელაცის უხეიროდ მოგერიებულ ბურთს შვეიცარიელმა ფეხი უხეიროდ დაარტყა და ბურთი კარს რამდენიმე მეტრით ასცდა.
ბენიტესმა მოედანზე პრიმავერელი ალიბეკი და ნვონკვო შემოიყვანა. კიევოელებმა საპასუხოდ პელისე შეცვალეს დავიდე მოსკარდელით. თავდამსხმელი საკმაოდ აქტიურად ჩაერთო თამაშში და სულ მალე იხილა დამსწრე საზოგადოებამ მისი სახელი ტაბლოზე. მან გოლი მატჩის 82-ე წუთზე გაიტანა.
ინტერმა მაინც შეძლო ერთი საპასუხო გოლის გატანა. იგი ეტოომ მატჩის ძირითად დროს დამატებულ მეორე წუთზე გაიტანა. ფლანგიდან გარღვევასა და სამი ოპონენტის მოტყუებას კარის ბადეში გახვეული ბურთი მოაყოლა კამერუნელმა და ანგარიშიც საბოლოოდ 2-1 დაფიქსირდა.
ამრიგად, ინტერი მილანს უკვე ცხრა ქულით ჩამორჩება. მატჩის დაწყებამდე ინტერის პრეზიდენტმა მასიმო მორატიმ განაცხადა, რომ ბენიტესი წაგების შემთხვევაშიც დარჩებოდა გუნდში. თითქოს გამოიცნო "შავ-ლურჯთა” პრეზიდენტმაო… თუმცა სავარაუდოა, რომ ტვეენტესთან განცდილ კრახს ესპანელი სპეციალისტის პოსტიც გადაყვეს…
