ამ ზაფხულს ნიჭიერი ბრაზილიელი მოიერიშე კოუტინიო 18 წლისა მოიყარა და იტალიურ სერია A-ში თამაშის უფლებაც მიეცა. იგი "ინტერმა” ორი წლის წინ მის გამზრდელ "ვასკო და გამასგან” 3,8 მილიონ ევროდ იყიდა, მაგრამ იქვე დატოვა არენდით და ახლაღა წამოიყვანა. 
აპენინებზე ჩამოსულ კოუტინიოს იტალიურმა გაზეთებმა პირველივე დღეებში თავბრუ დაახვიეს, ათასნაირი მეტსახელი და შედარება მოუგონეს, რომელთაგან ყველაზე მეტად ყვირის "ახალი რონალდინიო”. კოუტინიო La Gazzetta dello Sport-თან საუბარში ხელებს ასავსავებს და ცდილობს აქედანვე დააღწიოს თავი იარლიყებს.
"მე მხოლოდ კოუტინიო ვარ, ბიჭი, რომელიც განაგრძობს ზრდას, რონალდინიო კი ლეგენდაა და მან უკვე ყველაფერი მოიგო. ის თვით ფეხბურთია. ერთადერთი რამით შეიძლება მიმამსგავსონ მას, მასავით მარცხენა ფლანგიდან მიყვარს იერიში და შესაძლოა ამის გამო მომაკერეს ეს მეტსახელი, რომელსაც ოდნავადაც არ ვიმსახურებ. ყველას გთხოვთ, ნუ დაგვაყენებთ ერთმანეთის გვერდით, მე რომ მის ნახევარს მივაღწიო, უბედნიერესი კაცი ვიქნები.”
რონალდინიოზე საუბრით რომ გული იჯერა, კოუტინიომ თავისი ახალი გუნდის ერთ-ერთ ლიდერ ვესლი სნეიდერს შეასხა ქება - "ის "ოქროს ბურთს” იმსახურებს. მე ვუყურე მის ვარჯიშს და დარეტიანებული ვიყავი, ის ნამდვილი ლეგენდაა. ვეცადე, მისი საიდუმლო ამომეხსნა და მის ფიქრებში შემეღწია, გამომეცნო მისი მოძრაობა და ასე გამეშიფრა მისი თამაში. მერწმუნეთ, ეს შეუძლებელია. ის გონებით დაფრინავს, წინასწარ ხედავს მოვლენებს. აი ასეთი სწრაფი მინდა ვიყო.”
ავტორი: გიგა თედორაძე
|
