ჟოზე მოურინიოს "რეალში" გადასვლა პრაქტიკულად უკვე გადაწყვეტილი ამბავია. იტალიელი და ესპანელი ჟურნალისტები ჯიუტად ამტკიცებენ, რომ პორტუგალიელი სპეციალისტი მადრიდში გადაბარგებას უახლოეს დღეებში ოფიციალურად გამოაცხადებს. ამჯერად, პირენეული პრესა უკვე იმას განიხილავს, რომელი ფეხბურთელებით გაძლიერდება მოურინიოს "რეალი". 
ესპანელი მიმომხილველები ირწმუნებიან, რომ სეუ ჟოზე "სამეფო კლუბში" სერია A-ს 3 ფეხბურთელის მიყვანას ეცდება. ამათგან 2 ინტერელია - ბრაზილიელი მარჯვენა მცველი დუგლას მაიკონი და "ნერაძურის" საუკეთესო ბომბარდირი, არგენტინელი დიეგო მილიტო, რომელიც მილანელებმა გასულ ზაფხულს "ჯენოასგან" შეიძინეს.
ბრაზილიელი უკანახაზელის მიმართ ინტერესს "რეალი" უკვე დიდი ხანია იჩენს. მადრიდელებს იმედი აქვთ, რომ გუნდში მოურინიოს მისვლის შემდეგ, მაიკონის გადაბირება გაცილებით გაიოლდება. რაც შეეხება დიეგო მილიტოს, ესპანური პრესის ინფორმაციით, "სამეფო კლუბის" ხელმძღვანელობას არგენტინელი გოლეადორის შეძენა პორტუგალიელმა სპეციალისტმა სთხოვა.
აღსანიშნავია, რომ წლევანდელი სეზონი ორივე მათგანმა შესანიშნავად ჩაატარა. მილიტომ 35 საჩემპიონატო შეხვედრაში 22 გოლი გაიტანა და ბომბარდირთა დავაში მხოლოდ ანტონიო დი ნატალეს ჩამორჩა, ხოლო მაიკონმა სერია A-ს 33 მატჩში 6 გოლთან ერთად, 10 შედეგიანი გადაცემაც მიითვალა.
"რეალის" მესამე "იტალიური" შენაძენი, შესაძლოა, "ლაციოს" სერბი მარცხენა მცველი ალექსანდრ კოლაროვი გახდეს. მადრიდელებს ბალკანელის გადაბირება იანვარშიც სურდათ, მაგრამ მაშინ მხარეები ფინანსურ საკითხზე ვერ შეთანხმდნენ და გარიგებაც არ შედგა. ამჯერად, ესპანური კლუბი გაცილებით უფრო სარფიან შეთავაზებას ამზადებს.
ეს ყველაფერი ესპანური მედიის მიერ გამომზეურებული მადრიდელთა სატრანსფერო ამოცანებია, თუმცა, ჯერჯერობით, უცნობია იტალიური კლუბების ხელმძღვანელთა პოზიცია - დათანხმდებიან თუ არა ისინი თავიანთი ლიდერების "რეალში" გაშვებას.
| 
ფაილების კატალოგი 
