მილანის "ინტერის” თავდამსხმელს მარიო ბალოტელის, ჩემპიონთა ლიგის 1/2-ფინალში "ბარსელონასთან” (3:1) ჩატარებული პირველი შეხვედრის შემდეგ, "სან სიროს” სტადიონის ავტომანქანების სადგომზე გულშემატკივრებთან კონფლიქტი მოუვიდა.
ინტერნეტ-გამოცემა Sky Italia-ს ინფორმაციით, "ინტერის” ფანებმა ბალოტელიზე თავდასხმა სცადეს, მაგრამ სტადიონის უსაფრთხოების სამსახურმა ფეხბურთელი დაიცვა და ავტომანქანამდე მიაცილა.
მილანელი ქომაგები იმ ფაქტმა გააცხარა, რომ 19 წლის თავდამსხმელმა თამაშის შემდეგ, გაურკვეველი მიზეზით, გუნდთან ერთად გამარჯვების აღნიშვნა იუარა და გაბრაზებულმა მაისური მოედანზე დააგდო, რის გამოც ტრიბუნებიდან სტვენა დაიმსახურა. გარდა ამისა, ბალოტელის გასახდელში მარკო მატერაცისთან მოუვიდა შელაპარაკება.
მილანელთა პრეზიდენტმა მასიმო მორატიმ განაცხადა, რომ მომხდარი ბალოტელისთვის გაკვეთილი იქნება. თუმცა იქვე დაამატა, რომ ის ამჯობინებს უფრო მეტად კატალონიელებთან მოპოვებულ გამარჯვებაზე იფიქროს, ვიდრე ამ ინციდენტზე: "ის უბრალოდ ბავშვია. სიმართლე გითხრათ, ვამჯობინებ გამარჯვებაზე ვიფიქრო, ვიდრე ბალოტელის თავს მომხდარ ამბავზე. ეს "ჭრილობა” მალე შეუხორცდება. რაც შეემთხვა, შესაძლოა, მისთვის კარგ გაკვეთილად გამოდგეს და მომავალში გამოადგეს”. ავტორი: გიგა თედორაძე
|
